حوار ( بي جازك )

ظهرت في السنوات الأخيرة مفردات خاصة بهذا الجيل كما أن لهم أغاني هي في غاية الروعة والجمال أمثال ( حركتك جبانة ) و أنا بريد البواليس ، الجبنة الجامايكية ، المحروق يرووق كما لا ننسى رائعة العصر ( ورا ورا ) ، طيب مالو ما دا جيل ودي ثقافته ،، بس لكن ما ننسى أنو الأخوة المغتربين قاموا بنشر كثيرا من هذه الاغاني في دول اغترابهم ،، يعني انتشرت التريلا وخلافها في كثير من دول الخليج ،، وانت زعلان مالك ما دي دعاية واعلان بالمجان للغناء السوداني ،، طيب ،،، مالك متردد قول الفي قلبك كلو ،، طيب الشعراء الزمان ديل نقول عليهم شعراء متأخرين ولا شنو أمثال الحلنقي ، بازرعة ، عوض أحمد خليفة ، مبارك بشير ، ،،، والله قول زي ما تقول فيهم بس نحن معشر الشباب بنشوف انهم ما قدموا للفن السوداني حاجة ،، يعني عندك (......غرزة ) دي سمعتها في حفلة دبي ،، ياخي دي حاجة ما تتكرر ،، ولا ( .....مدني ) ياخي دي أكدت أنو الفن السوداني في تطور قال فضل الله محمد قال ،،،،طيب خليني اوافقك في الرأي ،، طيب الموسيقي ( ربب رب ،، ربب رب ) موسيقى واحدة ،، ياخي أنت متخلف لا زلت مؤمن بالسلم الخماسي ،، الناس طلعت سلم الهجيج ،، الهجيح ،، أي الهجيج ،،، طيب ماشي قصة الزيت الممسحين بيه المغنيين والمغنيات دا برضو تطور ،،، ياخي صدقني انت متأخر خالص ،، لما الحكومة تكون عايزة تعيين وزير مش بتقوم بتلميعه فترة ،، آي طيب دا ما تلميع ،، صراحة القارئ العزيز أن حجة  صديقي الجهبذ كادت أن تجعل الدموع تطفر من عيوني وقد لحظ ذلك فقام معدلا من بنطاله ( المقصر) ويرتب بعض الخصل من شعره وهو يردد بي جازك